Kuri uyu wa Kabiri tariki ya 9 Kamena 2020, Minisiteri y’Ubuzima yatangaje ko mu Rwanda hatahuwe abarwayi 12 bashya b’icyorezo cya Koronavirusi (COVID-19), bituma umubare w’abamaze kwandura mu Rwanda ugera kuri 461.
Muri abo batahuwe mu Rwanda Kuva umurwayi wa mbere yatahurwa muri Werurwe uyu mwaka, hamaze gukiramo 300, hakaba hakirwaye 161 barimo kwitabwaho n’abaganga.
Abarwayi bashya bagaragaye mu Kareree ka Rusizi n’i Rusumo mu Karere ka Kirehe, bakaba bashyizwe mu kato n’abo bahuye bagahita bakurikiranwa. Kugeza ubu hamaze gufatwa ibipimo 80,129.
Igikorwa cyo gupima abantu mu buryo bwa rusange mu Gihugu kirakomeje, ndetse Akarere ka Rusizi n’aka Rubavu twashyizwe mu kato mu gihe hagisuzumwa abantu ngo harebwe uko ubwandu buhagaze muri utwo duce.
Mu tundi turere, ingendo zihuza intara zitandukanye n’Umujyi wa Kigali zakomorewe. Abaturarwanda barasabwa kurushaho kubahiriza amabwiriza yo kwirinda ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa arukoro yabugenewe.
Imibare yatangajwe ku rwego mpuzamahanga yerekana ko muri Afurika abamaze kwandura COVID-19 bageze ku 197,313 barimo 86,338 bakize n’abandi 5,357 bahitanywe na cyo. Abamaze kwandura ku Isi bangana na 7,271,098 barimo abakize 3,581,077 n’abapfuye 411,577.
NIKUZE NKUSI Diane
